ही रंगीत लय सुंदर आहे.

सूर्य अजून उग्र झाला नाही. संध्याकाळ सोनेरी करण्याइतकी कोवळीक त्याच्यात आहे. आपण ते सोने अंगावर घेत डुलत डुलत या देखण्या रस्त्यावरून जात आहोत.

पावसातून उठून गडद रंगांची फुले पुन्हा तरारून हसत आहेत.

खजुराच्या झाडांवर नरमाद्यांचे तुरे एकत्र आणण्याचे काम प्रेमळ इंडोनेशियन माळिणीने पार पाडले आहे. तिने हे मला अरबीत सांगितले, आणि मला ते कळले आहे.

पलीकडच्या निळ्यानिळ्या अरबी समुद्रात डॉल्फिन्स सोनेरी उन्हात उसळ्या मारत आहेत. समुद्रपक्षी पाण्यावर घिरट्या घेत आहेत. यांना अरबीत ‘नवरस’ म्हणतात हे आठवून मला नेहमीप्रमाणे बरे वाटत आहे.

ही रंगीत लय सुंदर आहे.

संध्याकाळ उदास करून जगातल्या दु:खात आणखी एकाने भर घालू नये, हे निष्पर्ण पर्वतांवर उगवणारा चंद्र सांगत आहे.